Num 17 | NdeIBE | STEP | UJehova wathi kuMosi,

Numbers 17

Ukuhluma kwentonga ka-Aroni

1 UJehova wathi kuMosi, 2 “Tshela abako-Israyeli ukuthi bakuphe izintonga ezilitshumi lambili, kuphume ibenye kumkhokheli munye ngamunye wesizwana sabokhokho bakhe. Bhala ibizo lendoda ngayinye entongeni yayo. 3 Entongeni kaLevi uzabhala ibizo lika-Aroni, ngoba kumele kube lentonga eyodwa emele inhloko inye ngayinye yesizwana sabokhokho bayo. 4 Zifake eThenteni lokuHlanganela phambi kobuFakazi, lapho engihlangana lawe khona. 5 Intonga yendoda engizayikhetha izahluma, njalo mina ngizahle ngikuqede lokhu kukhonona okulokhu kuqhubeka kusolwa wena ngabako-Israyeli.”

6 Ngakho uMosi wakhuluma kwabako-Israyeli, abakhokheli babo bamnika izintonga ezilitshumi lambili, ngayinye ingeyomkhokheli wesizwana sabokhokho bakhe, kwathi leka-Aroni yayibalelwa kuzonalezo. 7 UMosi wabeka lezontonga phambi kukaJehova eThenteni lobuFakazi.

8 Ngosuku olulandelayo uMosi wangena eThenteni lobuFakazi wabona ukuthi intonga ka-Aroni eyayimele indlu kaLevi, yayisihlumile yaqhakaza, isilamaluba njalo isithele izithelo ze-alimondi. 9 Ngakho uMosi wazisusa zonke izintonga phambi kukaJehova waziletha phambi kwabo bonke abako-Israyeli. Bazikhangela, ngulowo wathatha eyakhe intonga.

10 UJehova wathi kuMosi, “Buyisela intonga ka-Aroni phambi kobuFakazi, igcinwe khonapha ibe yisibonakaliso kulabo abahlamukayo. Lokhu kuzaqeda ukukhonona kwabo ngami, ukuze bangafi.” 11 UMosi wenza khona lokho kanye uJehova ayemlaye ngakho.

12 Abako-Israyeli bathi kuMosi, “Sizakufa! Sifile, sonke sesifile! 13 Loba ngubani ozasondela phansi kwethabanikeli likaJehova uzakufa. Sizakufa sonke na?”